GILIBKAS na ni Cebu Governor Pamela Baricuatro ang ban sa pagsulod sa tanang baboy ug ubang mga produkto gikan sa ubang probinsiya sa Hulyo 3, 2025.
Kini maoy gipahibalo ni Baricuatro agi og paghatag og alibyo sa mga Sugboanong konsumidor gumikan sa nagpadayong pagsaka sa presyo sa baboy sa lalawigan nga giingong niabot na sa P400 ang matag kilo.
“...we signed an executive order lifting the restriction the entry of livestock. It was brought about because of the present situation karon nga taas kaayo ang per kilo sa pork. I think karon naa na sa P400/kilo and in the other province its like almost 100 plus ang atoa ang pinakataas all over the country ang Cebu so concerning kaayo,” matod ni Baricuatro sa Hulyo 3, 2025.
Nag-terminate kini sa lagda ni kanhi Cebu Governor Gwendolyn Garcia nga nagmando alang sa pag-control ug pag-mitigate sa epekto sa African Swine Fever (ASF).
Bisan sa pagtugot na sa pagbaligya og produktong karne sa merkado, gimando gihapon ang pagsunod sa biosecurity measures ang tanang mga produkto.
Naglakip kini sa valid Veterinary Health Certificate nga giisyu sa government-licensed veterinarian diin sa probinsiya nga gigikanan niini, aprubado nga Shipping Permit nga gi-isyu sa Bureau of Animal Industry (BAI), ug ang Meat Inspection Certificate alang sa processed o slaughtered meat.
Gipasalig sa kagamhanan nga taliwa sa paglibkas sa ban, magpabilin ang strikto nga surveillance.
Gipasabot ni Dr. Mary Rose Vincoy, Provincial Veterinarian nga ang bag-ong mando wala magpasabot nga wala na ang risgo sa sakit sa baboy ug ubang mga produkto sa Sugbo. / ANV