Wala pa’y kasiguroan nga makaduwa si Indiana Pacers All-Star guard Tyrese Hali-burton batok sa Oklahoma City Thunder sa Game 6 sa National Basketball Association (NBA) Finals nga ipahigayon sa balwarte sa Pacers karong Biyernes, Hunyo 20, 2025 (PH time).
Matod sa tinubdan sa The Associated Press, ipaubos si Haliburton sa MRI Exam aron masuta kon unsa ka grabe ang angol sa iyang tuo nga tiil, nga tatawng naghasol kaniya atol sa kapildihan sa Pacers sa Game 5, 109-120, nga nagtagak kanila sa 3-2 nga biya sa best-of-seven series.
Ning maong duwa, igo lang nakamugna og upat ka puntos si Haliburton nga layo ra sa kasagaran niyang kontri-byusyon sa kinatibuk-ang playoffs.
Dili gustong magpaila ang tinubdan gumikan kay wala gibutyag sa Pacers ang kondisyon ni Haliburton sa publiko.
“We’ll evaluate everything with Tyrese,” matod ni Pacers coach Rick Carlisle nga napatik sa AP News.
Sa Game 5, nibiya si Haliburton sa 1st quarter ug sa iyang pagbalik, giputos na ang iyang tuo nga tiil.
Sulod sa 34 ka minutos nga niduwa si Haliburton apan nasipyat siya sa tanan niyang unom ka mga itsa nga maoy labing unang higayon nga iya kining nasinati.
Nagkanayon si Carlisle nga nakahunahuna siya nga dili na paduwaon si Haliburton sa 2nd half apan nisupak si Haliburton niini.
“I mean, it’s the NBA Finals. It’s the finals, man,” batbat pa ni Haliburton. “I’ve worked my whole life to be here and I want to be out there to compete. Help my teammates any way I can. I was not great tonight by any means, but it’s not really a thought of mine to not play here. If I can walk, then I want to play. They understand that. And it is what it is. Got to be ready to go for Game 6.”
Ning maong playoffs, kapila na sab nga higayon nga nahimong bayani sa Pacers si Haliburton nga maoy naghatod kanila sa finals sa labing unang higayon gikan niadtong tuig 2000. / Gikan sa wires