Kon lumba pa, nakauna na og tikang si World Boxing Council (WBC) welterweight champion American Mario Barrios sa mga posibleng mahimong kontra sa sunod nga away ni Filipino boxing legend Manny Pacquiao.
Si Barrios maoy kontra sa comeback fight ni Pacquiao niadtong Hulyo 19, 2025, sa MGM Grand Garden sa Las Vegas, USA nga niresulta sa majority draw.
Human sa away, nakahisgot dayon si Pacquiao og dinaliang rematch apan paglabay sa pipila ka mga adlaw, adunay laing upat ka mga pangalan nga posibleng makababag sa rematch.
Gipangtumbok mao sila si Floyd Mayweather, Jervonta Davis, Rolando Romero, ug Ryan Garcia.
Dili pa lang dugay, gikompirmar ni Pacquiao nga mobalik siya pag-away karong Disyembre, 2025, apan wala pa’y klaro kon kinsa ang posibleng iyang kontra.
Isip reaksyon niini, ang trainer ni Barrios nga si Bob Santos nibutyag nga hayag ang posibilidad nga ang rematch nila ni Pacquiao ug Barrios maoy unang mahitabo.
Hinuon, gipasabot ni Santos nga nagdepende ra ang tanan sa lakang nga pagahimuon sa duha ka mahinungdanong mga personalidad – ang boxing managers nga sila si Al Haymon ug Luis DeCubas Jr.
Si Haymon maoy nagdumala ni Pacquiao samtang si DeCubas Jr. maoy nagdumala ni Barrios.
“That’s really going to be up to Al Haymon and Luis DeCubas Jr.,” matod ni Santos sa interbyu sa World Boxing News.
“I have no clue at this point, but it’s definitely up to Al and Luis what they’re gonna do.”
Gipasabot ni Pacquiao nga duha ra ka mga buwan siyang nag-training sa premirong away nila ni Barrios unya mao sab kini ang labing una niyang away sulod sa hapit upat ka mga tuig nga pagretiro.
Taliwala niini, nakasugakod gihapon ang 46 anyos nga Hall of Famer batok sa 30 anyos nga si Barrios. / ESL