POSITIBO nga usa ka matang sa illegal drugs sama sa party drugs o Methylenedioxymethamphetamine (MDMA) ang mga ebidensya nga nakuha sa mga sakop sa Police Regional Office (PRO) 7 sa sulod sa giabangan nga lawak niadtong nagpaila nga Chemical Engineer Stephen Tapulado, nga nahimutang sa dalan D. Jakosalem, Barangay Zapatera, Dakbayan sa Sugbo.
Ang mga nakuhang ebidensya sama sa mga powder, kapsula sa tabletas ug uban pa, gipaubos sa chemical analysis sa mga chemist sa Philippine Drug Enforcement Agency (PDEA) 7 atol sa pagronda sa kapulisan.
Matod ni Police Brigadier General Redrico Maranan ang hepe sa Police Regional Office (PRO) 7 nga nagpamatuod nga ang apartment sa suspek gihimo gyud nga lutoanan sa ilegal nga drugas sama sa ecstasy, shabu, ug cocaine.
Kini nga resulta sa PDEA 7 laboratory magpalig-on sa kaso nga ilang ipasaka kang Tapulado ug sa live-in partner niini nga si Delca Delminguez.
Nipasabot si Maranan nga si Tapulado mao gyud ang tinubdan sa suplay sa party drugs sa Central Visayas ug ang mga downline niini nadakpan na sa nangaging anti-illegal drug operation sa kapulisan.
Tungod sa pagkasikop sa tinubdan, nagtuo si Maranan nga mohinay na sab ang suplay niini sa Sugbo, isla sa Boracay, ug sa Dakbayan sa Zamboanga. / AYB
