Managlahi ang reaksiyon ang gipadayag sa netizens sa lanog nga dunk ni Anthony Edwards sa Minnesota Timberwolves diin iyang gilakip sa iyang poster si Kevon Looney sa Golden State Warriors.
Makita sa hulagway nga naglutaw padulong hansak si Edwards samtang nawala sa balansi ug nagtakilid nga midepensa si Looney.
Matod sa usa ka netizen nga grabe ang koleksiyon ni Edwards sa mga hansak sa edad pa lang nga 23-anyos, ug daghan pang makita ang basketball fans sa umaabot nga tuig.
Ang usa pud nga netizen miingon nga susama ang maong dunk sa gibuhat sa legendary nga si Michael Jordan.
Dugang pa sa uban nga netizens nga kon magpadayon lang si Edwards sa iyang gipakita nga abilidad, layo ang maabtan sa karera niini ug malakip siya sa Hall of Fame sa umaabot.
Ang maong hansak nahitabo sa Game 3 sa Western Conference semifinals kagahapon diin midaog ang Timberwolves batok sa Warriors ug mikuha og 2-1 series nga labaw. / RSC