DUNAY bag-ong testing center ang mo-host sa Computer-Based Licensure Examination (CBLE) nga magtanyag og unom ka licensure exams pinaagi sa Professional Regulation Commission (PRC) 7.
Gilantaw kini nga usa ka dakong lakang sa pagpalambo sa access sa licensure examinations dinhi sa rehiyon.
Ang bag-ong gitukod nga sentro dunay CBLE system nga may 282 computer units, nga maoy pinakauna sa Kabisay-an.
Sa pakighinabi sa mga sakop sa media human sa pagbukas sa kalihukan, si PRC Commissioner Erwin Enad nitataw nga ang initiative kabahin sa paningkamot sa PRC pag-modernize ug pag-digitalize sa licensure exam process.
“It’s not just about the preparation or the actual conduct of the computer-based exams; it also enhances the assessment process, making it much easier and more efficient,” matod ni Enad.
Ang facility mag-alagad isip CBLE ug regular testing venue nga dunay 282 ka mga laptop, nga nagtugot sa parehas og gidaghanon sa mga examinees nga mokuha sa ilang eksaminasyon sa samang higayon.
Si PRC 7 Regional Director Narcival Taquiqui nidugang, “Currently, we’re targeting small to medium-scale examinations, but we plan to expand to areas with a larger number of examinees in the near future.”
Matod niya, makompleto ang CBLE sud lang sa upat ka buwan.
Sa pagkakaron ang PRC nagtutok sa 16 ka propesyon alang sa small- to medium-scale licensure exams, nga naglakip sa: Sanitary Engineers, Dental Technologists, Speech-Language Pathologists, Dental Hygienists, Psychologists, Plant Mechanics, Librarians, Ocular Pharmacologists, Optometrists, Naval Architects, Chemists, Meteorological Engineers, Mining Engineers, Geologists ug X-ray Technologists. / CDF