Gipangulohan ni Presidente Ferdinand “Bongbong” Marcos Jr. ang pag-abli sa “Brigada Eskwela” 2025 sa Department of Education (DepEd) sa Bulacan sa Lunes, Hunyo 9, 2025.
Si Marcos kauban ni Education Secretary Sonny Angara, niinspeksyon una sa nagpadayon nga pag-ayo sa eskuwelahan ug uban pang mga pagpangandam sa Barihan Elementary School sa Malolos, Bulacan.
Nasaksihan sab niya ang pag-instalar sa usa ka bag-ong smart television sa Tibagan Elementary School sa Lungsod sa San Miguel.
Atol sa inspeksyon, matod ni Marcos nga gikinahanglan kaayo ang pagpaayo sa mga comfort room ug sistema sa suplay sa tubig sa pampublikong eskuwelahan.
Namamatikdan sab sa presidente ang iyang gihulagway nga “Marcos-type” nga mga classroom nga karaan na ug kinahanglan na nga ayuhon.
Gisusi sab nila ni Marcos ug Angara ang gisugyot nga mga plano sa pagtukod alang sa eskuwelahan nga daling bahaon.
Ang Brigada Eskwela molungtad gikan sa Hunyo 9 hangtod Hunyo 13, usa ka semana sa dili pa magsugod ang School Year 2025-2026 sa Hunyo 16.
Matod sa DepEd nga dul-an sa 27 milyunes ka mga estudyante ang na-enroll para sa School Year 2025-2026. / TPM / SunStar Philippines