Nisugyot og balaudnon si Senador Imee Marcos nga nagtinguha nga idili ang pagdakop o pag-detain ni bisan kinsa sulod sa teritoryo sa Pilipinas aron itugyan ang usa ka tawo ngadto sa internasyonal nga entidad nga walay warrant of arrest gikan sa lokal nga korte.
Gisang-at ni Marcos kaniadtong Lunes, Hulyo 14, 2025, ang Senate Bill No. 557, o usa ka balaod nga nagdili sa talagsaon nga pagtugyan sa mga tawo ngadto sa langyaw nga hukmanan (Foreign Jurisdiction), naila sab nga “President Rodrigo R. Duterte Act.”
Ubos sa gisugyot nga balaudnon, gidili ang pag-imbestiga, pagdakop, pag-detain, ug pagbalhin o pagpabalhin sa bisan kinsang tawo nga makit-an sulod sa teritoryo sa Pilipinas ngadto o ubos sa mando sa usa ka internasyonal nga korte, tribunal, organisasyon, o estado nga walay aktibong kasabutan sa Pilipinas, walay pagtugot sa indibiduwal nga hingtungdan, o walay mando gikan sa lokal nga korte.
Pugngan sab niini ang gobiyerno sa Pilipinas sa paghatag og bisan unsang matang nga suporta sa mga imbestigasyon sa internasyonal nga korte, tribunal, o organisasyon batok ni bisan kinsang tawo sulod sa nasod nga walay permiso gikan sa Department of Justice ug sa Department of the Interior and Local Government.
Ang mga makalapas mahimong mag-atubang og hangtod 20 ka tuig nga pagkabilanggo ug multa nga hangtod P10 milyunes.
Gisang-at ni Marcos ang gisugyot nga balaudnon tungod sa pagkadakop kang kanhi Presidente Rodrigo Duterte niadtong Marso 11, 2025, ubos sa mando sa International Criminal Court (ICC), taliwala sa imbestigasyon niini sa giingong mga krimen batok sa katawhan sa nasod kalabot sa drug war sa iyang administrasyon.
“What took place on that fateful day was an extraordinary rendition—the transfer without due process of a detainee to the custody of a foreign jurisdiction,” matod ni Marcos.
“Thus, it is necessary to make it exceedingly clear—if it is not yet clear already—that arresting an individual for the purpose of turning him or her over to a foreign jurisdiction without an order and a warrant of arrest issued by a Philippine court is against the Constitution and punishable under the law,” dugang niya.
Si kanhi Presidente Duterte kasamtangang gi-detain sa pasilidad sa ICC sa Hague, Netherlands. / TPM