Nisaka ang presyo sa pipila ka isda sa Carbon Public Market niining panahon sa Semana Santa.
Base sa monitoring sa Office of Cebu City Markets, nisaka og P30 ang pipila ka matang sa isda nga gibaligya sa merkado.
Sa Lunes, Abril 14, 2025, ang kilo sa mamsa naabot sa P300 gikan sa P270, bangus tag P230 gikan sa P210, budboron mapalit sa P200 gikan sa P160, bariles nga tag P120 miabot na sa P200, ug yellowfin nisaka sa P200 gikan sa P160.
Sa miaging buwan, ang presyo sa mamsa kay P380 ang kada kilo, bariles tag P240 ang kilo, ug yellowfin tag P240, bangus tag P220, ug budboron tag P170.
Ang panginahanglan sa isda kasagarang motaas panahon sa Semana Santa tungod kay ang mga tawo magpuasa ug maglikay og kaon og karne sa Biyernes Santo hinungdan nga motaas usab ang presyo niini.
Samtang, usa usab sa nag-unang palitunon panahon sa pagpuasa mao ang mga sangkap para sa binignit nga anaa makit-an sa Carbon market.
Kining mga sangkap sa binignit naglangkob sa lubi nga mapalit sa P40 ang buok, landang tag P250 ngadto sa P260 ang kilo, saging cardaba tag P30-P50 ang kilo, camote’ng orange ug kamote’ng
tapol tag P35-P60 ang kilo, nangka tag P150 ang kilo, sago tag P5 ang putos, gabi tag P80-P100 ang kilo, pilit tag P80 ang kilo, mascovado nga asukar tag P90 ang kilo, ube tag P120 ang kilo, ug camote’ng yellow tag P35-P40 ang kilo. / CDF