Magsugod karong adlaw’ng Martes, Hulyo 8, 2025, ang gamay nga pagkunhod sa presyo sa lana, sumala sa pahibalo sa dagkong kompaniya sa petrolyo sa nasod.
Base sa ilang tagsa-tagsa ka advisory, nipahibalo ang Pilipinas Shell, Seaoil, Caltex, Petrogazz, ug Cleanfuel nga adunay P0.10 matag litro nga rollback sa diesel, P0.70 matag litro sa gasolina, ug P0.80 matag litro sa kerosene.
Ang maong pag-usab sa presyo ipatuman sugod alas 6:00 sa buntag sa Hulyo 8.
Niadtong miaging semana, mas dako ang rollback nga natala: P1.80 kada litro sa diesel, P1.40 sa gasolina, ug P2.20 sa kerosene.
Ang sunod-sunod nga rollback nakahupay gamay sa transport groups ug motorista human sa dakong pagsaka sa presyo sa lana sa katapusang semana sa Hunyo diin nisaka kini og P3.50 kada litro sa gasolina, P5.20 sa diesel, ug P4.80 sa kerosene. / TPM / SunStar Philippines