Pasado sa Department of Trade and Industry (DTI) ang presyo sa mga nag-unang palaliton sa Dakbayan sa Mandaue base na usab sa giya sa presyo sa ahensiya subay sa compliance inspection nga nagpamatuod sa stable nga suplay, barato nga presyo, ug hustong pagka-calibrate sa mga timbangan alang sa mga konsumidor.
Ang inspeksyon, nga gihimo niadtong Huwebes, Agusto 14, 2025, gipangulohan ni OIC Fair Trade Enforcement Bureau Chief Atty. Regino Mallari sa DTI, kinsa nibisita usab sa Colonnade Supermarket. Gisusi sa iyang team ang presyo sa bugas, canned goods, instant noodles, ug uban pang importanteng produkto tandi sa suggested retail prices (SRPs) sa ahensya, samtang gisiguro usab nga ang “Timbangan ng Bayan” weighing scale, tukma ug anaa sa maayong kondisyon.
Gikumpirma sa ahensiya nga ang mga merkado nagsunod sa listahan sa SRP sa DTI. Sumala sa price guide, ang usa ka 155g nga lata sa sardinas susama sa mga brand sama sa Young’s Town ug Ligo gipresyohan og P17.30 ug P17.50, matag usa.
Alang sa instant noodles, ang usa ka pakete sa 55g nga Lucky Me! Mapa-baka man o manok ang flavor, nalista nga tag P7.75. Ang ubang staple canned goods, sama sa 150g can sa Argentina Corned Beef, gibaligya sa tag P29.50, samtang ang 175g nga lata sa Century Tuna Flakes in Oil nagkantidad og P29.10.
Matod ni Mallari nga ang inspeksyon nagbunga og positibo nga mga resulta, diin ang parehong merkado publiko ug supermarket misunod sa mga sumbanan sa SRP.
Dugang niini nga dili lang igo ang suplay sa bugas sa Mandaue kondili mas ubos pa ang presyo niini kon itandi sa ubang lugar sa Sugbo, nga naghatag bintaha sa mga konsumidor.
Nagkalainlain ang presyo sa bugas depende sa klase ug gigikanan. Ang Myanmar rice nagkantidad og P41.00 matag kilo, samtang ang Vietnam rice nagkantidad og P47.00 matag kilo. Ang ubang mga klase naglakip sa Lion Ivory nga tag P51.00 ug P55.00 matag kilo, nga nagsugyot og lainlaing grado.
Ang mga lokal nga klase sama sa Lotus ug Dinorado gipresyohan og P45.00 ug P38.00 matag kilo. King Leonie sa P38.00 matag kilo ug Golden Fields nga labing barato sa P37.00 matag kilo.
Namatikdan ang maong han-ay sa mga presyo atol sa pag-inspeksyon sa DTI, nga nagpamatuod nga ang bugas ug uban pang mga batakang palaliton “affordable” ug nga ang merkado adunay “stable” nga suplay. / CAV