Nisaka ang presyo sa daghang palaliton sa sari-sari stores sa tibuok Pilipinas, bisan pa sa pagkunhod sa inflation rate sa nasod.
Base kini sa datos sa tech startup nga Packworks nga nisusi sa kapin usa ka milyon ka transaksiyon matag bulan gikan sa kapin 300,000 ka sari-sari stores gamit ang ilang app nga Sari IQ.
Gikan sa tuig 2023 hangtod 2025, ilang natuki nga padayon ang pagsaka sa presyo sa daghang produkto nga nisaka og average nga 11% sa pipila ka kategoriya.
Ang presyo sa 50ml nga Johnson’s Baby Oil nisaka gikan P42 ngadto P49, samtang ang 100g nga Tender Care Baby Powder nisaka gikan P40 ngadto P50.
Ang mga rehiyon nga nakasinati sa maong pagtaas mao ang Ilocos, Cagayan Valley, Central Luzon, MIMAROPA, ug Bicol.
Sa pagkaon ug meryenda, 11 ka klase sa produkto ang nitaas og labaw pa sa 13%. Ang 50g nga Lala Fish Crackers misaka gikan P18 ngadto P23, samtang ang 150g nga Fres candy nisaka gikan P36 ngadto P42.
Ang pagsaka sa presyo namatikdan sa siyam ka rehiyon, lakip na ang Central Visayas ug Eastern Visayas.
Matod ni Andoy Montiel, Chief Data Officer sa Packworks nga dali ra maapektuhan ang sari-sari stores sa bisan gamay nga pagtaas sa presyo sa wholesale tungod sa gamay nilang ginansya.
Sa mga low-income nga komunidad, mas klaro ang epekto niini sa mga konsumidor nga nagsalig sa mga tindahan para sa ilang adlaw-adlaw nga palitunon.
“Sari-sari stores are known for their thin profit margins. While they operate as viable businesses, they also serve as extended pantries and community hubs for their neighbors. Even a slight increase in wholesale prices reveals how vulnerable micro-retailers are to cost shifts upstream. This creates a ripple effect, especially in low-income communities where these stores are the primary source of daily essentials,” matod ni Montiel.
Nasuta sab nga ang presyo sa bugas nisaka gikan sa P235 sa 2023 ngadto P295 sa 2024. Sa unang lima ka buwan sa 2025, medyo nikunhod kini ngadto sa P285 human sa pagpahamtang sa suggested retail price sa imported rice.
Bisan pa, mas taas gihapon kini sa national average nga P50.54/kilo. Ang tingi-tingi nga bugas nga sagad ibaligya sa sari-sari stores nagpabiling mas mahal, bisan og gisulayan kini og himuon nga abot-kaya.
Gipasabot ni Bing Tan, CEO sa Packworks, nga ang sari-sari store dili lang tindahan kondili tinubdan sa panginabuhi sa kadaghang pamilya.
Matod niya, ang datos sa Sari IQ nagpakita sa aktuwal nga kahimtang sa mga gagmay’ng negosyante nga kasagaran walay direkta nga benepisyo gikan sa macro-level nga mga polisiya.
“Sari-sari stores are more than just retail outlets, but a lifeline for millions of Filipinos. Our latest analysis reveals gaps between national macroeconomic reports and the grassroots micro-retail reality. These insights can act as early indicators to inform distribution chains and policymakers of where support and aid are most needed. It is our hope that by sharing this timely data, we will be able to shed a brighter light on the challenges in practical pricing our store owners face in serving their communities,” pasabot ni Tan.
Bisan pa sa pag-ubos sa inflation rate sa papel, daghang komunidad ang wala pa makasinati og tinuod nga kausaban sa presyo.
Ang mga sari-sari store nagpabiling sentro sa komunidad apan nanginahanglan og dugang nga suporta aron makalahutay. / PR