Ang kagamhanan sa Lalawigan sa Sugbo gikatakdang magmugna og sa usa ka komprehensibo nga mekanismo aron pagmonitor sa presyo sa merkado, diin tumong niini ang pagkuha ug pagkonsolida sa mga presyo sa nagkadaiyang local government units (LGUs).
Kini nga inisyatibo gipasiugdahan ni Gobernador Pamela Baricuatro, kinsa miluwat og Executive Order (EO) aron pagtukod og local price monitoring committees alang sa probinsiya.
Si Aldwin Empaces, ang assistant provincial administrator sa Kapitolyo, nipasabot niadtong Miyerkules, Hulyo 9, 2025, nga ang tahas sa probinsiya mao ang “pagkonsolida sa mga presyo... Nga mamahimong mekanismo sa pagmonitor sa presyo sa tibuok probinsya.”
Si Empaces bag-o lang nitambong sa usa ka conference uban sa Department of Trade and Industry (DTI) sa Kapitolyo, diin ang nasudnong ahensya nipadayag sa dugay na nilang tumong nga ma-activate ang maong price monitoring committees sa tanang LGUs.
Namatikdan niya nga samtang kini nga mga komitiba nagamit na sa mga dagkong syudad sama sa Mandaue, Lapu-Lapu, ug Cebu City, wala pa kini magamit o gisugdan sa ubang mga LGU.
“Nagstroya mi with DTI, they said that dugay (nani nila) gusto mahitabo, nahitabo na sa Mandaue, Lapu-Lapu, Cebu City, pero on other LGU, wala pa kaayo na siya ma activate or ma functional,” pasabot niini.
Ang tumong sa Probinsiya mao ang pagmugna og hiniusa nga magamit sa mga component cities sama sa Toledo ug Bogo, ug unya i-extend kini sa tibuok probinsya.
Si Empaces namahayag nga ang mga rekomendasyon ug mga giya alang sa programa isumiter karong Lunes, Hulyo 14, aron pagtugot sa gobernador sa pagpatuman niini.
“That’s a best way nga, somehow, data driven atong reporting, dili haka-haka,” matod ni Empaces, kinsa gipahimug-atan ang tumong sa paghatag og tukma ug sakto nga impormasyon sa presyo. Ang maong monitoring maglakip sa tanang produkto nga anaa sa merkado nga nasubay sa mandato sa DTI. / JPS