Gipanawagan ni Senador Sherwin Gatchalian ang Department of Trade and Industry (DTI) niadtong Lunes, Pebrero 10, 2025 nga tutokan ang mga presyo sa pan.
Ang pan ilabi na ang pandesal usa sa mga nag-una nga pagkaon sa mga Pilipino gawas sa bugas/kan-on ug gikabalak-an nga adunay pagsaka sa presyo niini.
Sa pamahayag sa senador nga iya sab nga gi-awhag ang kagamhanan nga ipabilin ang pricing transparency ug isiguro nga ang pagpa-umento sa presyo sa pan resonable ug naay igong basehanan.
Nisugyot si Gatchalian nga mohatag sab og suporta ngadto sa mga baker nga mapalambo ang ilang paghimo ug pabilin nga affordable ang ilang pan.
“The government should explore measures to stabilize production costs, such as securing reliable chains for wheat and other essential ingredients and providing necessary support for bakers to enhance production efficiency,” matod pa ni Gatchalian.
Gipasiugda ni Gatchalian nga ang pagpaseguro sa kasayon sa pagpalit sa mga nag-unang palitunon mahinungdanon alang sa mga konsumidor nga Pilipino.
Kini taliwala sa pagsaka sa presyo sa daghang importante nga grocery items—lakip ang pan, gatas, de-lata, sabon, battery ug uban pa.
Base sa labing uwahi nga suggested retail price (SRP) bulletin sa DTI nga gipagawas niadtong Pebrero 1, 2025 nga sa 77 sa 191 ka mga nag-unang palitunon nga ilang gi-monitor ang misaka ang presyo, apil niini ang duha ka mga brand sa pan.
Sukad sa SRP bulletin nga gipagawas niadtong Pebrero 8, 2023, wala ma-usab ang SRP sa Pinoy Pandesal ug Pinoy Tasty.
Sa labing uwahi nga gi-anunsyo, misaka og P2.25 ngadto sa P3.50 ang SRP sa 250grams nga Pinoy Pandesal ug 450grams nga Pinoy Tasty. / PNA