Nalaksi ang pipila ka bahin sa atop sa Inghoy National High School, Barangay Valencia, Lungsod sa Alegria, Lalawigan sa Sugbo sa dihang usa ka dako nga punoan sa kahoy ang natumba.
Ang kahoy nga rose wood natumba tunong sa principal’s office ug sa school canteen human naluka kini tungod sa kusog nga hangin, sa mga alas 9:30 sa buntag, Sabado, Septiyembre 14, 2024.
Ang Alegria Municipal Disaster Risk Reduction Management Office ang mihawan sa dakong punoan ug padayon pa nga gisusi ang kinatibuk-an’g danyos sa maong kadaot.
Ang mga kadagkoan sa Inghoy National High School nga taliwala sa maong hitabo mapasalamaton sila nga dili sa adlaw sa tingklase nahitabo ang maong pagkatumba sa kahoy. / DVG