Nagsal-ot og beterano ug dekalidad nga pointguard ang Rain or Shine Elasto Painters sa ilang batan-ong puwersa alang sa pagpadayon sa ilang kampanya sa Philippine Basketball Association (PBA).
Gitumbok mao ang kanhi No. 1 overall pick, kanhi scoring champion, four-time champion, ug 7-time All-Star nga si Stanley Pringle, kinsa usa ka unrestricted free agent.
Gianunsyo sa Elasto Painters ning Martes, Hulyo 15, 2025, nga nipirma na og duha ka mga tuig nga kontrata si Pringle sa ilang prangkisa.
Si Pringle, 38, katapusang nagduwa sa Terrafirma Dyip gikan sa iyang pagserbisyo sa NorthPort Batang Pier (kanhi GlobalPort), ug Brgy. Ginebra Gin Kings.
Gilauman nga dako og matampo si Pringle sa puwersa sa Elasto Painters, nga gipangulohan nila ni Adrian Nocum, Gian Mamuyac, Anton Asistio, Andrei Caracut, Keith Datu, ug Santi Santillan. / ESL