Nakadawat og lainlaing reaksyon ang gihimong pamaagi sa Commission on Elections (Comelec) nga nipabutar og sayo sa mga senior citizen, persons with disability (PWD) ug sa mga mabdos atol sa eleksyon sa Mayo 12,2025.
Gipatuman sa Comelec ang sayong oras sa botasyon ning maong mga sektor sa alas 5:00 sa buntag.
Sa Basak Elementary School, Lapu-Lapu City, si Leonardo Gelicame, 53, lumolupyo sa Barangay Basak, nihulagway sa pamaagi nga nagpasayon kanila.
Nibotar siya kauban sa iyang anak nga si Val Leonardo Gelicame, nga first time voter.
Matod ni Gelicame nga daghan ang nitabang kanila ug sa iyang anak nga usa ka PWD.
Sa Robinsons Galleria, nga gigamit nga polling center ning eleksyona, dunay magtiayon nga nihulagway sa ilang kasinatian nga mas sayon ug paspas.
Ang bana nga usa ka PWD, nipahimulos sa sayong oras sa pagbutar ug niingon nga nakasinati siya og kasayon.
Dunay sobra sa 2,000 ka registered voters sa Barangay Parian ang niboto sud sa mall.
Sa Central Visayas, ang mall voting nahitabo ra sa Cebu didto sa Robinsons Galleria ug SM Consolacion.
Samtang sa Mandaue City, si Annesita Seroy, 74, nakasinati og dugay kaayo nga pagboto komparar sa niaging barangay election.
Niabot siya sa polling center alas 5:00 sa bunta ug nahuman alas 6:00 na.
Matod ni Seroy nga ang mga botante nipakita sa ilang mga cluster number, ID, ug asa sila nalista. Kining maong proseso gihulagway niyang maoy nakalangay.
Laing senior citizen nga nagdumili sa pagpaila, nidason sa sentimento ni Seroy.
Matod niya nga taas kaayo ang linya ug ang proseso mokaon og taas nga oras./DPC/CDF/CAV