PRO 7 full alert human sa pagpamomba sa MSU

PRO 7.
PRO 7.File photo

Human sa pagpamomba sa sulod sa Mindanao State University (MSU) sa dakbayan sa Marawi niadtong Dominggo, Disyembre 3, 2023, nimando gilayon ang hepe sa Police Regional Office 7, Police Brig. General Anthony Aberin, sa tanang city ug provincial police office directors nga isaka ang ilang alert status gikan sa normal ngadto sa full alert.

Tumong sa kapulisan nga ang nahitabo sa dakbayan sa Marawi, lalawigan sa Lanao del Sur dili moabot sa Central Visayas pinaagi sa hugot nga intelligence monitoring uban sa ilang counterparts didto sa Mindanao.

Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga tungod sa kadaghan sa mga kalihukan sa dakbayan sa Sugbo sama sa Pasko ug kadaghan sa mga tawo nga mosuroy, angay nga pahugtan pa ang ilang pagpatuman sa siguridad.

Mopakatap ang CCPO og mga personnel gikan sa Explosives Ordnance Disposal dala ang ilang mga K9 sa mga dapit nga daghang mga tawo nga modugok sama sa Fuente Osmeña ug sa downtown Colon sa dakbayan sa Sugbo.

Kini nga mga dapit hugopanan sa mga tawo panahon sa kagabhion tungod sa prog­rama sa siyudad sa Sugbo nga Pasko sa Dakbayan.

Dugang ni Rafter nga mimando karon si Police Colonel Ireneo Dalogdog sa iyang mga station commanders ug mga personnel nga makig-alayon sa nagkalainlaing sektor sa katilingban aron matabangan sila sa pagbantay sa ilang tagsa-tagsa ka barangay o mga komunidad.

Nakigtagbo si Dalogdog uban sa mga hepe sa onse ka police stations sa mga Muslim leader sa dakbayan aron magpatabang sa pagbantay sa ilang komunidad nga dili masagulan sa mga dautang elemento ug pagmintinar sa kahusay ug kalinaw.

Masaligon ang kapulisan sa Muslim community sa Sugbo sanglit sa matag dunay mahitabo sa Mindanao, kanunay sila nga mopasalig nga andam nga motabang sa pag monitor sa posibling tinguha nga mohimo’g kasamok dinhi sa siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph