Nag-una sa tibuok Pilipinas ang Police Regional Office 7 sa ilang kampanya pagpatuman sa Comelec gun ban human moabot sa 877 ka unregistered firearms ang ilang nasakmit sukad nagsugod ang election period niadtong Enero 12, 2025.
Sa labing uwahing datus sa PRO 7, nakasakmit sila og 811 ka armas atol sa mga operasyon nga naglangkob sa buy- bust, 53 ang nakuha atol sa pag-serve sa search warrants ug pito sa pag-serve sa warrant of arrest sa mga akusado nga dunay mga pending warrant of arrest samtang unom sa nagkalainlaing checkpoints.
Ang Central Visayas maoy nag-una sa 17 ka police regional offices diin nalabwan pa nila ang National Capital Region Police Office (NCRPO) nga dunay 675 nga gisundan sa Police Regional Office 3 nga nakasakmit og 503 ka mga armas.
Tungod niini, si Police Brigadier General Redrico Maranan, hepe sa PRO 7, midayeg sa iyang mga personnel nga walay hunong sa ilang paningkamot aron masiguro ang kalinaw ug seguridad sa nagsingabot nga piniliay sa Mayo 12, 2025.
"This is a result of our intensified security operations and our commitment to preventing election-related violence. Every firearm we recover is one less tool for crime and intimidation. We will continue working around the clock to ensure that the people of Central Visayas can vote freely and safely," matod ni Maranan.
Dugang ni Maranan nga ning nagkaduol na ang eleksiyon gihingusgan pa sa PRO 7 ang ilang kampanya batok sa loose firearms aron mabawi kini gikan sa mga kamot sa mga kriminal nga mamahimong magamit sa pagpanghulga ug pagpang-harass sa mga botante hinungdan unya pagpatumaw sa kagubot sa eleksiyon. / AYB