Gihangop sa Police Regional Office (PRO 7) ang deklarasyon ni Cebu City Mayor Michael Rama bahin sa pagpatuman sa liquor ban sa mga publikong lugar sa tibuok dakbayan sa Sugbo atol sa Sinulog Festival karong Dominggo, Enero 21, 2024.
Matod ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, hepe sa PRO 7, ang pagdili sa inom atol sa Sinulog dako og ikatampo sa pagpatuman sa kahusay ug kalinaw sa kapulisan.
Malikayan ang mga kaso sa physical injuries nga maoy kasagaran mahitabo kon dunay kagubot gumikan sa kahubog.
Sa matag panahon sa Sinulog dunay mga kaso sa kagubot sa Gen. Maxilom Avenue nga maoy tapukanan sa mga batan-on aron mag street party.
Sa pagtumaw sa mga lamoklamok, maglisod na ang mga polis sa pag-uwang.
Dugang ni Pelare nga sukad gibuksan ang 459th Fiesta Senior hapsay, malinawon ug solemne ang mga relehiyusong kalihukan tungod sa pagpakabana sa mga Sugboanon pinaagi sa pagtuman sa mga lagda nga gihan-ay sa kapulisan ug kadagkuan sa lokal nga kagamhanan.
Dako usab og natampo niini ang maayong koordinasyon sa mga departamento sa gobyerno ug mga law enforcement agencies nga nagtinabangay nga mahimo’ng malinawon ug malampuson ang Sinulog 2024.
Samtang nanawagan siya sa padayong suporta sa pagpatunhay sa kahusay ug kalinaw atol sa Sinulog.
WALKTHROUGH
Gipahigayon sa kapulisan ug ubang mga ahensya sa gobyerno nga mohatag sa hugot nga siguridad ang walkthrough sa rota sa Sinulog grand parade sa South Road Properties (SRP) sa pagpangulo ni Police Colonel Noel Flores, deputy regional director for operation ug Police Colonel Ireneo Dalogdog, hepe sa kapulisan sa dakbayan sa Sugbo.
Dinhi masayran kon asa nila ipamutang ang liboan ka mga polis nga maoy mobantay sa mga contingent paingon sa venue diin sila mohimo sa ilang Sinulog showdown.