Nasubo ang tibuok pwersa sa kapulisan sa Central Visayas sa kamatayon sa ilang kauban nga nitubag og armed person alarm sa dalan P. Del Pilar, Siyudad sa Danao sa alas 12:20 sa hapon, Biyernes, Hunyo 27, 2025 human mapusilan.
Gihulagway sa Police Regional Office 7 si Police Patrolman Mark Gomer Ornopia nga usa ka dedicated nga police officer sanglit wa kini magduhaduha sa pagtubag sa alarma uban sa usa ka sakop sa Bureau of Jail Management and Penology (BJMP).
Si Ornopia naigo sa iyang ulo sa dihang gipusil gamit ang armas sa guwardiya sa Golden Crest Pawnshop.
Human napusilan ang biktima, ang sakop sa BJMP nibawos usab nga nakaigo sa dughan sa suspek nga si Argie Catipay, 24, lumad nga taga Negros.
Ang biktimang pulis ug ang suspek pulos gipangdala sa Cebu Provincial Hospital sa Danao apan nakabsan gyud sa ilang kinabuhi.
Si Police Brigadier General Redrico Maranan, hepe sa PRO 7 nihatag og katapusang pagsaludo kang Ornopia ug nipahasubo sa pamilya ug kabanay sa iyang sakop.
“We salute the bravery of our personnel who made the ultimate sacrifice just to ensure the safety of the residents of Danao. His dedication and courage in the face of danger exemplify the highest ideals of the Philippine National Police. We honor his heroism and assure his family that his sacrifice will never be forgotten,” matod ni Maranan.
Ang PRO 7 mohatag og pasidungog sa bayanihon nga pagsakripisyo sa kinabuhi sa polis dungan sa saad nga tabangan ang nabilin nga pamilya ilabi na sa asawa ug ang bugtong anak.
Nagpadayon ang gihimong imbestigasyon sa Danao City Police Station ug kon dunay mapasakaan og kaso ila kining buhaton aron mahatagan og hustisya ang kamatayon sa maong polis. / AYB