Sugod sa Lunes, Abril 14, 2025, gisaka na sa Police Regional Office 7 ang ilang alert status gikan sa normal ngadto sa heightened alert subay sa pagsugod sa Oplan Summer Vacation kon Sumvac.
Matod ni Police Brigadier General Redrico Maranan, hepe sa kapulisan sa Central Visayas nga moabot sa kapin 2,000 ka mga police personnel ang ipakatap sa mga lugar nga tapukanan sa mga tawo.
Base sa ilang datus, dunay kapin sa 200 ka mga simbahan, kapin sa usa ka gatos ka transportation hubs ug ang mga tourist destination nga ilang patutukan sa seguridad subay sa napanglantawan nga maoy dagsaon sa mga tawo ning panahon sa bakasyon ug paghandom sa Semana Santa.
Usa sa iyang patutukan ang isla sa Bantayan tungod kay naila kini nga dayuhon sa mga turista subay sa kapistahan sa maong lugar.
"Local tourists will be going there, yung ating motorist assistance desk sa ating mga major thoroughfare will be manned by policeman to assist our kababayan when they are traveling,” matod ni Maranan.
Si Police Colonel Jovito Atanacio, ang hepe sa kapulisan sa Probinsiya sa Sugbo, nipahibawo nga nagpatawag na siya og security meeting sa tulo ka police station sa isla sa Bantayan nga nag langkob sa Santa Fe, Bantayan ug Madridejos lakip na ang San Remegio diin naa sa maong dapit ang pantalan padulong sa isla sa Bantayan.
Magdugang si Atanacio og mga police personnel sa isla sa Bantayan aron moabag sa puwersa sa tulo ka police stations sa isla. / AYB