Nagbangutan ang kapulisan sa Central Visayas sa kamatayon ni Police Staff Sgt. Ryan Baculi sa Regional Police Drug Enforcement Unit (RPDEU 7) atol sa buy-bust sa alas 12:05 sa kaadlawon sa Miyerkules, Nobiyembre 15, 2023.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office (PRO)70, nga nagpadayon ang ilang manhunt batok sa duha ka mga suspek nga pulos dunay warrants of arrest.
Nalambigit sa ilegal nga drugas ang duha. Gani sa background niini, sila hitman sa mga durugista. Lakip sa ipaubos sa imbestigasyon, matod ni Pelare, ang posibling kalambigitan sa usa ka barangay tanod nga gitawag sa suspek.
Si Baculi, dunay lima ka mga anak, taga Brgy. Zaragosa, lungsod sa Aloguinsan.
Gihulagway kini ni Pelare nga kugihan ug daghang awards, nisulod sa PNP sa Septiyembre 12, 2014.