Giandam na sa Police Regional Office (PRO) 7 ang mga police personnel nga ipakatap alang sa pagsugod sa kampanya sa local nga mga kandidato karong Marso 28, 2025.
Matod ni Police Brigadier General Redrico Maranan, ang hepe sa PRO 7 nga sa miaging tuig pa sila nakaandam uban sa Commission on Election ug sa Armadong Kusog sa Pilipinas.
Nakalusad na sila og lima ka Regional Joint Security Control Center meeting sa pagpangulo sa Comelec 7 aron i-assess ang sitwasyon sa tibuok rehiyon ning nagkaduol nga kampanya.
Awhag ni Maranan sa mga kandidato nga sundon lang ang lagda sa Comelec ug ang tanang batakang balaod sa Pilipinas aron makab-ot ang malinawon, hapsay ug matinud-anon nga piniliay sa Mayo 12, 2025.
Samtang, gi-monitor sa PRO 7 ang himuon nga mga programa sa mga supporter ni kanhi Presidente Rodrigo Duterte sa Marso 28, 2025, atol sa pagsaulog sa iyang ika 80 nga adlaw'ng natawhan. / AYB