Gihulagway sa Police Regional Office (PRO 7) nga wala ra makabalda ang gilusad nga nationwide transport strike sa Pagkakaisa ng mga Samahan ng Tsuper at Opereytor Nationwide (Piston) ug ubang transport group sa Lunes Abril 15, 2024.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas (CV) nga hugot sila nga nag monitor sa dagan sa trapiko kon maparalisar ba kini tungod sa maong kalihukan.
Apan wala mabalaka ang kapulisan gumikan kay daghan sa mga modern public utility vehicle ang nagdagan sa kadalanan aron mohatag og serbisyo sa riding public.
Bisan pa niini, giandam usab sa kapulisan ang ilang mga patrol car subay sa kamandoan ni Aberin nga kon dunay mga pasahero nga matanggong diha sa karsada ila kining tanyagan og libreng sakay kon asa man sila mopaingon.
Matod ni Pelare nga magpadayon ang ilang monitoring karong adlawa, Martes,Abril 16, 2024, tungod kay nipahibawo man ang Piston nga duha ka adlaw ang ilang lihok protesta.
Una na nga nisupak ang transport group sa Pilipinas nga mao ang Piston uban sa Manibela sa dili pag lugway sa franchise consolidation nga kutob na lang sa katapusang bahin sa Abril 2024. / AYB