Pormal nang gipasakaan og kaso ang Vietnamese national nga maoy gitudlo nga tag-iya sa Adora Beauty Clinic nga nahimutang sa Centro Maximo Building, Jakosalem Street, Barangay Cogon Central Ramos, Cebu City lakip na ang 11 ka staff human masuta nga nigamit sila og mga produkto sa pagpa-enhance sa dagway nga dili rehistrado sa Food and Drug Administration (FDA).
Ang Police Regional Office (PRO) 7 maoy nihikay sa reklamo niadtong Martes, Hulyo 22, 2025, nga kalapasan sa Republic Act 9711 o Food and Drug Administration Act of 2009 ug Republic Act 2382 o Medical Act of 1959 ang gihimo sa nagdumala sa maong Aesthetic clinic nga gi-promote online.
Matod ni Police Colonel Arvie Paraon-Bueno, spokesperson ni Police Brigadier General Redrico Maranan hepe sa kapulisan sa Central Visayas nga nahitabo ang pagronda sa Adora Beauty Clinic tungod sa reklamo sa tulo ka customers dihang nabantayan nila nga walay label ang beauty products lakip na ang mga tambal nga gidapat sa ilang pagpa-enhance sa ilang mga dagway.
Nasuta usab nila nga dili mga lisensyado nga mga doktor o nurse ang mohimo sa cosmetic procedures sa ilang customers nga nakahatag og kabalaka kanila.
“Kasi 'yung illegal operations po nagpo-pose sila ng significant risk including yung life threatening complication po, imagine po yung improperly administered na cosmetic procedures at saka unregulated po na gamot na nakompiska,” matod ni Bueno.
Gibutyag ni Bueno nga ang gihimo sa PRO 7 mao ang pagpanalipod sa seguridad sa publiko ilabi na sa mga Sugboanon nga makagamit sa mga produkto sa maong Beauty Clinic.
Naalarma ang kapulisan sa dihang ilang nasayran nga dili registered doctor o nurse ang nag-administer sa cosmetic procedure.
Giangkon sa mga trabahante nga wala sila moeskwela niini nga matang sa trabaho sanglit ang ilang kasinatian mao lang ang pag-asikaso sa ilang mga customer.
“Delikado po talaga yung hindi professional yung nag a-administer sayo tapos yung gamot unregulated pa, life threatening po ito,” dugang ni Bueno.
Giawhag sa kapulisan sa Central Visayas kadtong mga customer sa Adora Beauty Clinic nga nabiktima nga modangop sa ilang buhatan alang sa dugang nga kaso nga ipasaka.
Nagtuo si Bueno nga duna pay daghan ang nahadlok human sila nakapa-enhance sa maong beauty clinic.
Lakip sa ilang gipangsusi sa pagkakaron kon pila ka branch ang maong beauty clinic sa Central Visayas aron ila kining isunod sa pagronda.
Gitan-aw sa PRO 7 ang posibleng pagpasaka og dugang nga kasong Anti-Dummy Law batok sa Vietnamese national sanglit wala ni moangkon nga siya maoy nanag-iya sa maong beauty clinic apan ang mga trabahante, siya ang gitudlo.
Samtang giklaro sa kapulisan nga dili pa mahimong makabalik sa ilang operation ang maong beauty clinic sanglit mag-atubang kini og laing kaso kon ila kining buhaton.
Nagtuo si Bueno nga dako ang posibilidad nga manginlabot ang kagamghanan sa Dakbayan sa Sugbo ilabi na ang Business Permit and Licensing Office tungod kay walay permit sa FDA ang mga produkto niini nga gigamit sa ilang mga customer. / AYB