Sa tinguha nga mapadayon ang mga biyaa’ng programa ni outgoing Cebu Governor Gwendolyn Garcia, usa ka memorandum ang giluwatan sa iyang buhatan alang sa buhatan sa Provincial Treasurer's Office niadtong Martes, Hunyo 16, 2025.
Ang Memorandum No. 36-2025 nagmando sa pagbutang og trust funds aron mapadayon ang mga flagship program ni Garcia bisan sa bag-ong administrasyon nga modumala sa Kapitolyo, lakip na ang nakontrobersiyal nga Suroy Suroy Sugbo.
Ang maong direktiba nga: “Creation and Establishment of Trust Funds for Various Programs of the Province of Cebu,” giisyu Garcia pinaagi sa memo 36-2025 alang ngadto sa Provincial Treasurer nga si Roy Salubre.
Ang maong direktiba nasubay sa Section 309(b) of Republic Act 7160, nga naila nga Local Government Code of 1991.
Ang mga programa nga gigahinan sa maong trust funds nalakip:
○ Sugbo Segurado
○ Sugbo Negosyo
○ Sugbo Kahanas
○ Sugbo Patubig (Carmen and Moalboal Waterworks)
○ Sugbo Kuryente (Malapascua)
○ Sugbo Semento
○ Sugbo Sentro
○ Tourism (Canyoneering and River Adventure)
○ Cebu Provincial -Government (CPG) Lot Sales
○ Settlement Account (Interest on Overnight Placement)
○ Mactan-Cebu Bridge Management Board (MCBMB)
○ Ubang mga proyekto nga ubos sa 20 porsiyento nga Development Fund
Si Salubre sa iyang bahin nagdumili sa pagluwat og pamahayag labot sa maong memorandum tungod kay wala pa niya madawat.
"Ako sa tan-awon kay wala pa ko kadawat ana, tua pa sa Governor's office. Dili sa ko mo-comment ana, ako sa tan-awon ug unsa na," matod ni Salubre sa iyang pamahayag sa Superbalita Cebu sa Hunyo 17, 2025, pinaagi sa tawag.
REAKSIYON
Samtang ang kampo ni Governor-elect Pamela Baricuatro pinaagi ni Atty. Edmund Lao, nangulo sa transition team ni Baricuatro nagkanayon nga ugaling molingkod na ang bag-ong gobernador, lakip kini sa ilang susihon pagsiguro nga nahisubay sa aprobado nga lagda sa hunta probinsyal
Gipasabot sab niya nga sagad sa pundo nga gamiton sa Trust Fund mga salin sa mga na-budget na ubos sa General Fund.
"Not necessarily nga maghimo ka og trust fund, pwedi nga naay mga ordinances but ang mga pundo are part of general funds.
“So, kon part siya sa general funds kon naay dili magamit nimo, naay mga nahibilin nga funds adto na didto pwedi nimo gamiton sa lain but naay proseso," pasabot ni Lao. / dugang taho ni CDF