Gilusad sa kagamhanan sa Siyudad sa Sugbo ang "256K Trees Project" alang sa umaabot nga henerasyon, nga gisugdan sa pagtanom og 5,000 ka punoan sa bakhaw (mangrove) sa South Road Properties niadtong Biyernes, Hulyo 25, 2025.
Dul-an sa 500 ka volunteers gikan sa nagkalainlaing organisasyon, pribadong sektor, ug mga empleyado sa City Hall ang ning-apil sa pagtanom og mga bakhaw.
Kini kabahin sa tumong sa administrasyon nga makatanom og “256K Trees Project" alang sa kaugmaon sa Sugbo.
Si Cebu City Mayor Nestor Archival niapil sa kalihukan sa pagpananom og kahoy ug personal nga nitanom og usa ka propagule.
Sa usa ka interbyu sa reporter, matod ni Archival nga 150 lang ka mga tawo ang ilang gilauman nga mangapil apan kapin sa 500 ang nangabot, lakip na ang mga kabatan-unan.
Gipahiuyon ang kalihukan sa pagsaulog sa International Day for the Conservation of Mangroves.
"This mangrove will stand tall and strong, reminding us all that true leadership is rooted in service and love for our people and our home," asoy ni Archival.
Matod niya nga ang mga bata maoy inspirasyon niya ug sa ubang mga hamtong nga ipadayon ang inisyatiba sa pagpananom og kahoy sulod sa sunod tulo ka mga tuig. / EHP