Nahurot sa pagkasunog ang 21 ka stalls sa prutasan sa Barangay Poblacion, lungsod sa Barili, alas 12:25 sa tungang gabii, Miyerkules, Mayo 8, 2024.
Kini ang gibutyag ni F01 Kim Miñoza, fire investigator sa kabumberohan sa Barili, nga gikahinabi sa Superbalita Cebu. Kini gisaka dayon sa 2nd alarm, nakontrolar sa ala 1:30 sa kaadlawon ug gideklarar nga fire out sa alas 2:10 sa kaadlawon.
Matod ni Miñoza, ang danyos sa sunog gibana-bana nga P35,000 apan way labot sa kwentada sa kabumberohan ang mga tindang mga prutas.
Atol ning pagsuwat, nagpadayon ang imbestigasyon kon unsay hinungdan sa pag-ulbo sa sunog sa maong prutasan nga ginama sa light materials.
Dugang nasayran nga ang prutasan nahimutang lang og pipila ka metro gikan sa merkado publiko sa maong lungsod.
Si Miñoza nagkanayon nga ikaduha na kini nga sunog nga niigo sa maong prutasan.
Ang una nahitabo niadtong Enero 12 , 2024 diin unom ka stalls ang nasunog tungod sa electrical misuse. / DVG