Subay sa adbokasiya ni Cebu City Mayor Nestor Archival nga menosan ang paggamit sa plastik, iyang gipahibalo ang plano nga magbutang og mga public drinking fountain sa tibuok siyudad isip kabahin sa iyang unang 100 ka adlaw sa katungdanan.
Gipahibawo kini atol sa interview kang Archival atol sa Waste Sorting Seminar, usa ka proyekto sa Junior Chamber International (JCI) Japan kauban ang Barangay Luz kaniadtong Sabado, Hulyo 5, 2025.
Kining lakang nagtumong sa paghatag og limpyo ug sayon nga mainom nga tubig sa mga pampublikong lugar ug pagdasig sa paggamit og reusable tumblers sa mga lumulupyo.
“Magbutang ta og mainom nga tubig sa mga lugar nga daghang mga common public spaces,” matod ni Archival sa usa ka interbyu.
“Ang mga tawo, they are going to refill, magdala sila og tumbler, diretso na nila ibutang.”
Matod ni Archival nga bisan usa lang ka instalasyon makahatag na og timailhan sa pagpakunhod sa basura nga plastik ug pagpalambo sa sustainability sa kalikupan .
“This is something nga the people will understand—that the City Government is taking care of the society and at the same time taking care of the environment,” dugang niya.
Ang kalihokan nga gitambungan ni Archival, nga dunay tema nga “Clean Communities Start with Us: Proper Sorting for a Greener Future,” nagtumong sa awareness responsable nga pagdumala sa basura ug hiniusang giorganisa sa JCI Japan, JCI Cebu, Guun Co. Ltd., ug sa Konseho sa Barangay Luz. / CDF