NABALIK na ang 24-oras nga operasyon sa Cebu City Public Library (CCPL) niadtong Lunes, Hunyo 30, 2025.
Kini nga lakang nagtuman sa saad sa mga opisyales sa dakbayan nga mahatagan og accessible nga learning spaces ang kabatan-onan ug ang publiko.
Si Mayor Nestor Archival ug Vice Mayor Tomas Osmeña ang nangulo sa seremonyas sa subling pagbukas sa library.
“This library, we offer this to the young people, for the students so that they can develop whatever they can in order to make Cebu number one again,” matod ni Archival.
Ang CCPL ang unang pampublikong library sa nasod nga nag-operate og 24/7.
Si kanhi Mayor Osmeña ang unang nagpatuman niini niadtong 2018, agi og tubag sa hangyo sa usa ka estudyante sa social media alang sa usa ka baratong lugar nga katun-an.
Gihisgotan ni Vice Mayor Osmeña ang mensahe sa estudyante nga gasto kaayo kon sa coffee shops magtuon, ug namatikdan niya ang kalampusan sa library kaniadto sa pagtabang sa mga estudyante nga mahimong “topnotchers.” / CDF / Divine Grace Bendanillo, CNU Intern, Ashley Judd F. Alon, UV Intern