Ablihan na og balik sulod gihapon sa 24-oras nga operasyon ang Cebu City Public Library.
Kini maoy gipahibalo ni Mayor-elect Nestor Archival aron paghatag og dakong pagtagad sa paghatag og access sa mga estudyante ug sa kinatibuk-ang publiko sa public library.
Sugdan ang pagbukas sa unang semana sa Hulyo, human opisyal nga molingkod ang bag-ong administrasyon.
Sa iyang Facebook post niadtong Martes, Hunyo 17, 2025, gipadayag ni Archival nga dili lang kini basta-basta pagpalugway sa oras sa operasyon.
Giila sa mayor-elect ang sagad nga kalisdanan sa mga estudyante sa siyudad nga nag-antos sa pagbalanse sa trabaho ug pagtuon.
“This is not just about reopening doors, but it’s about reopening a space where people can learn, grow, reflect, and dream,” kabahin sa post ni Archival.
“I know how many students in our city are working hard, juggling time, and simply looking for a quiet space to study, even late at night,” matod niya.
Sa usa ka interbyu niadtong Martes, giklaro ni Archival ang iyang plano nga nagpasalig sa publiko nga ang 24-oras nga operasyon sa public library magsugod sa higayon nga opisyal na siyang molingkod sa katungdanan.
"Inig sulod nako, inig kagabii ana ma-open nato ang public library 24 hours para sa mga kabatan-onan ug sa mga tawo nga gusto mo-avail,” matod niya.
Ang plano sa pag-abli og balik sa serbisyo naglakip sab sa importante nga mga kalambuan, sama sa mas maayong koneksyon sa internet aron suportahan ang panginahanglan sa mga estudyante pinaagi sa paghatag og teknolohiya nga makatabang sa tanang tiggamit sa library, ilabi na kadtong magtuon sa gabii.
"Ang importante lang naay internet para naa tay magamit,” matod niya.
Naglaom sab si Archival nga makig-alayon sa Department of Information and Communications Technology (DICT) aron masiguro ang serbisyo nga dili na kinahanglan og dugang nga budget.
Ang 24-oras nga operasyon sa public library nagsugod niadtong 2016 atol sa termino sa kanhi mayor, karon Mise Mayor-elect, Tomas “Tommy” Osmeña.
“Education has always been close to my heart, and I've always believed that learning happens not just in classrooms, but in the quiet corners where determination lives,” nagkanayon si Archival. / Antoinette Caren Arrabis, CNU intern