Mipagawas ang Securities and Exchange Commission-Cebu Extension Office (SEC-CEBEO) og usa ka public advisory niadtong Huwebes, Mayo 29, 2025, aron pasidan-an ang mga tawo batok sa BMJ Data Processing Services, usa ka kompanya nga nahimutang sa Barangay Kasambagan, dakbayan sa Sugbo, nga temporaryong gipasirad-an sa Business Permit and Licensing Office (BPLO) niadtong Mayo 20, 2025, tungod sa giingon’g pag-operate isip "scam hub."
Kini nga kompanya giingong nangolekta og mga puhonan, ilabi na sa cryptocurrency trading, bisan pa nga wala kini marehistro sa SEC.
Ang advisory gipagawas human gi-upload sa langyaw nga hacker sa iyang YouTube channel MWRN ang video diin gibutyag ang mga kalihokan sa pagkolekta og puhunan sa giingon’g mga call center agent sa BMJ Data Processing Services.
Ang maong kompanya gikataho nga kanunay nga magbalhin-balhin og opisina aron dili madetekan.
Sumala sa SEC-CEBEO, ang mga indibidwal nagpaila sa ilang kaugalingon isip financial representatives sa "Virtual Wealth Exchange."
Gikataho nga ilang saaran ang ilang mga kliyente og paspas nga return sa ilang investment gikan sa Bitcoin trading pinaagi sa usa ka sistema nga gitawag og "Quantum AI."
Ang mga kliyente agnihon sa pagbubo og puhonan labing menos $250, bugti sa daku nga ginansya ug libreng mentorship.
Giklaro sa SEC-CEBEO nga ubos sa Section 8 sa Securities Regulation Code (SRC) dili mahimo’ng mangolekta og puhonan ang BMJ Data Processing Services gikan sa publiko sanglit wala kini marehistro sa ilang buhatan.
Bisan tuod kon narehistro na kini sa Department of Trade and Industry (DTI) ubos sa BNN/Cert. 1839654, sa pangalan ni Antonio Seno Jacalan Jr. isip tag-iya, gipasiugda sa SEC nga ang rehistrasyon sa DTI wala nagpasabot nga ang kompanya aduna nay katungod sa pagkolekta og puhonan.
Gipasidan-an sa SEC ang publiko batok sa pagpakig-transaksyon sa BMJ Data Processing Services o sa mga representante niini.
Ang mga indibidwal nga naglihok isip brokers, ahente, o promoter sa maong scheme mahimong mag-atubang og kasong kriminal.
Ang mga malapason mahimong multahan og hangtod P5 milyon, mabilanggo og hangtod 21 ka tuig o pareho, ubos sa Section 11 sa Financial Products and Services Consumer Protection Act ug Section 28 sa SRC.
Kini nga matang sa fraudulent investment activities kasagarang gipadagan sa temporaryo nga mga call center nga kompanya nga nag-abang og mga opisina. / CDF