Gibutyag ni Davao City Representative ug reelectionist Paolo “Pulong” Duterte niadtong Sabado, Mayo 3, 2025, nga wala pa siya nakadawat og kopya sa reklamo nga gisang-at batok kaniya sa usa ka negusyante tungod sa kasong physical injuries ug grave threats.
Sa usa ka pamahayag sa video, giingon ni Duterte nga ang iyang mga abogado nag-authenticate pa kon asa gikan ang viral nga video nga nagpakita kaniya nga nidagmal sa reklamante.
“Sa akong mga kaigsuonan nga Davaoeño, nakita ninyo ang laing video; nahitabo na kana dugay na. Kamo gihapon ang magbuot kinsa inyong pilion nga kongresista sa first district. Dili ko manghilabot,” matod ni Duterte.
Gipasabot ni Duterte nga gipahibalo siya sa iyang abogado nga gisusi pa ang video aron masayran kon asa kini gikan.
Nidugang si Duterte nga daw unang gisumiter ang reklamo ngadto sa Criminal Investigation and Detection Group (CIDG) unya ang affidavit sa reklamante gi-post sa social media una kini gihatod sa fiscal’s office.
Giklaro ni Duterte nga tungod kay wala pa siya nakadawat sa dokumento sa reklamo, dili pa siya makahatag og komentaryo kabahin niini.
Sa kasamtangan, si Duterte naa sa Netherlands diin gibilanggo ang iyang amahan, Rodrigo Duterte, samtang nagpadayon pa ang imbestigasyon sa International Criminal Court (ICC) kabahin sa crimes against humanity nga gisang-at batok sa kanhi presidente sa war on drugs nga gipatuman sa administrasyon niini.
Sa usa ka pamahayag, gipanghimakak sa Philippine National Police nga aduna sila’y kopya sa CCTV footage kabahin sa insidente.
Giklaro sab sa PNP nga dili gikan sa ilang buhatan ang nag-viral nga video o sa ilang mga personahe.
“Likewise, the PNP denies any involvement in the dissemination of the affidavit of the complainant, which has also surfaced in public channels. The document in question was not released by the police, and the PNP has no official role in its circulation,” pamahayag sa PNP.
“The PNP respects the legal process and emphasizes that the case has already been formally filed before the Department of Justice. As such, any questions or clarifications regarding the merits of the complaint should be addressed to the appropriate office handling the matter.”
Hinuon, gipasalig sa PNP nga andam silang motabang ug makigtambayayong kon adunay opisyal nga hangyo gikan sa awtoridad.
Sa reklamo, giingon sa biktima nga nahitabo ang insidente niadtong Pebrero 23 sa usa ka bar sa Davao City.
Giingon niya nga gihulga siya ni Duterte gamit ang kutsilyo ug gidagmalan siya niini sulod sa duha ka mga oras.
Matod pa niya nga gipawong ni Duterte ang CCTV pagkahibalo niini nga adunay kamera.
Nihisgot sab ang reklamante nga gihatagan siya og kuwarta ni Duterte pagkahuman sa insidente.
Tungod sa kahadlok, matod sa reklamante nga wala dayon siya nisang-at og reklamo.
Sa interbyu sa mga sakop sa media, ang igsuon ni Paolo nga si Bise Presidente Sara Duterte niingon nga usa na usab kini ka ataki sa pulitika batok sa ilang pamilya.
“Oo, sinabi ko na nga ano na wala namang ibang ginawa ang administrasyon na ito kundi pamumulitika lang at paninira sa mga kalaban nila sa pulitika,” matod ni Sara.
“Kung napansin ninyo noong lumabas ‘yung malaking isyu ng mga blangko sa (2025) budget… At maraming nagtatanong at maraming nagsasabi na unconstitutional ‘yung budget. Tinanong kung paano naging legal ‘yung paggamit nila ng pera, eh puro blangko ‘yung nasa loob ng budget, ay lumabas ‘yung impeachment ko. Iyon ‘yun.”/ TPM / SunStar Philippines