Kulba-hinam ang lumba sa mga sakyanan sa dagat o ‘Bangkarera’ sa Sitio Lawis, Bantayan, Barangay Tuyom, dakbayan sa Carcar sa Dominggo, Marso 31, 2024, tungod sa pagsilaob sa usa ka pumpboat.
Tungod kini sa tumang kainit sa summer ug El Niño phenomenon, daling nasunog ang pump boat human gikataho'ng ni-backfire ang makina ug gituohan ni-leak sab ang gasolina.
Hinuon, daling nakaambak ang nagmaneho sa pump boat sa karera ug gitabangan usab sa mga tawo sa pagpawong ang kayo.
Samtang, usa ka jet ski nga gimaneho sa usa ka opisyal sa dakbayan nakasag-id og bata apan walay dakong kadaut sa lawas hinungdan nga wala na madala sa ospital human giatiman sa first aid personnel.
Si Romart Fernandez Larumbe Tangaro, usa sa mga barangay konsehal sa Tuyom ug nahinabi sa Superbalita Cebu, nagkanayon nga kini nga lumba sa sakyanan sa dagat tradisyon na sa kapistahan sa kapilya ni San Vicente.
“Every Easter Sunday gyud ang pista itunong..” matod ni Tangaro.
“Kining mga tawo sad modutdot sa pagtan-aw,” dugang ni Tangaro.
Sa kinatibuk-an, malampuson ug alegre ang kalihykan nga giapilan sa 15 ka mga pump boat nga giorganisar sa kahugpongan sa simbahan ug nagpakabana nga mga indibiduwal sa barangay.
Samtang, nasayran nga dunay dili mominos 10 ka mga jet ski ang ning-apil sa kapulisan nga gipangulohan sa lokal nga mga opisyal sa Carcar.
Sa pag-follow up sa Superbalita Cebu sa kapulisan sa Carcar, atol ning pagsuwat, wala pa na-blotter ang ginagmay nga panghitabo.
Matod ni Tangaro nga kompleto usab ang ilang permiso gikan sa siyudad ug Coast Guard sa pagpahigayon sa maong lumba. / Dugang ni DVG