Menor de edad nga wa na nahiuli sa ilang dapit human nanagat sa Biyernes sa alas 2 sa kaadlawon, Enero 26, naluwas sa search and rescue nga gilusad sa nagkadaiyang mga buhatan sa mga lungsod sa Argao ug Sibonga, habagatang Sugbo.
Naalarma ang mga sakop sa Municipal Disaster Risk Reduction and Management Offices (MDRRMO) sa Sibonga ug Argao, ingon man ang Philippine Coast Guard pagka missing ni Mark Stanley Cambarejan, 17, taga Pungtod, Simala, Sibonga taliwa sa nagdaut nga panahon ug kabaluron sa kadagatan.
Gibutyag ni Damiano Ofqueria Jr., pangulo sa Sibonga Municipal Disaster Risk Reduction Management Office, nga ila dayon nga giporma ang search and rescue teams sa Sibonga ug Argao, Coast Guard ug Regional Mobile Force Company sa Police Regional Office 7, taliwa sa dagkong mga bawod sa kadagatan dala sa hangin nga amihan.
Matod ni Ofqueria nga mga alas 3:00 sa hapon sa Biyernes, ilang nakit-an si Cambarejan nga sakay sa naglutawlutaw niyang motorbanca nga naaberiya kay nadaut ang makina niini.
Ila kining giabagan nga madala sa baybayon.