Ningsikit na sa ganghaan sa Top 4 ang Brgy. Ginebra Gin Kings human nila gipanghubog ang Grandslam-seeking TNT Tropang 5G, 97-78, sa main game niadtong Dominggo sa gabii, Hunyo 8, 2025, sa Philippine Basketball Association (PBA) Season 49 Philippine Cup sa Ninoy Aquino Stadium.
Sa kadaugan, ang Gin Kings ningsaka sa 7-3 nga rekord ug nakigbahin sa Magnolia Chicken Timplados Hotshots sa temporaryong ikatulong puwesto.
Aron makasiguro og puwesto sa Top 4, ang Gin Kings nagkinahanglan nga modaog sa katapusan nilang tahas sa elimination round batok sa Rain or Shine Elasto Painters.
Hinuon, aduna sab purohan nga makakuha na deritso og luna sa Top 4 ang Gin Kings sa ilang kasamtangang sitwasyon depende sa mga resulta sa nahabiling mga duwa sa teams nga nagsunod kanila sa standing.
Mahinungdanon ang pagsulod sa Top 4 kay maghatag kini og twice-to-beat nga benepisyo sa quarter-finals.
Sa kapildihan, ang Tropang Giga natagak sa 6-4.
Sa premirong duwa, gipangmakmak sa Blackwater Bossing ang Terrafirma Dyip, 97-82, sa kombati sa mga wala na’y paglaom nga makasulod sa quarter-finals. / ESL