Giilang high value individual (HVI) sa provincial level nakaeskapo atol sa buy-bust sa Drugs Enforcement Unit sa kapulisan sa lungsod sa Argao sa bukirang Barangay Bog-ut, Argao, alas 3 sa hapon sa Biyernes, Disyembre 8, 2023.
Ang target sa operasyon giila sa tinubdan sa iyang alyas nga ‘Palog’, hamtong ang panuigon, ulitawo apan may kapuyo, lumolupyo sa naasoy nga dapit. Nasakmitan siya og gituhoang shabu nga nitimbang og 300 gramos nga adunay standard drug price nga P2 milyunes.
Ang operasyon gipahigayon human sa pipila ka semana nga validation ubos sa kamandoan sa ilang hepe nga si Police Maj. Ivy Martin Bartolome.
Ang suspek, matod pa, maka-dispose og 100 gramos matag semana base sa validation sa kapulisan sa Argao.
Hinuon, nakaeskapo si Palog apan ang giingong kunsabo niini nga alyas ‘Jurin’, 33, minyo, taga Payahan, Barangay Bogo, nasikop.
Si Jurin nga na hinabi sa Superbalita Cebu, nihimakak nga kunsabo siya ni Palog, apan niangkon siyang iya ning ig-agaw.