Duha ka mga tawo ang nangamatay sa managlahi nga mga pagpamusil sa dakbayan sa Sugbo sa Biyernes sa gabii, Nobiyembre 10 ug Sabado sa hapon, Nobiyembre 11.
Sa mga eskina sa Dan Katipunan ug A. Lopez, Brgy. Calamba, patay nang naabtan sa emergency medical team sa Cebu City ang usa ka wa pa mailhing lalaki human pusila sa nagbinugtong nga gunman pasado ala 1 sa hapon.
Sa imbestigasyon ni Police Chief Master Sgt. Diosdao Parejas nga ang biktima nga nag short pants, gibana-bana’ng mga 40 anyos, naglakaw lang.
Usa ka lalaki nga nag jacket og puwa ang nisabay sa paglakaw dayon nipusil sa biktima.
Ang biktima dunay samad sa wala nga bahin sa lawas.
Nakuha gikan sa crime scene ang usa ka bala sa 9mm nga pusil ug duha ka mga kabhang.
Gilauman sa kapulisan nga makatabang sa ilang imbestigasyon ang CCTV camera nga naa tungod sa crime scene.
Usa ka saksi nga gikahinabi sa Superbalita Cebu sa crime scene niingon nga “bata pa man kaayo to uy” ang gunman.
Nidagan kini subay sa Dan Katipunan human sa pagpusil.
RIDER
Namatay diha-diha ang usa ka rider human pusila tumong sa mata alas 8 sa Biyernes sa gabii sa bukiran nga bahin sa Brgy. Quit.
Ang biktima giila nga si Regan Gañolon, 41, ulitawo, apan may ka puyo nga taga Sityo Badyang, Brgy. Toong, bukid sa Siyudad sa Sugbo.
Sa pakighinabi sa Superbalita Cebu kang Police Major Angelito Valleser, station chief sa Labangon Police Station, ilang nahibaw-an nga ang biktima rehistrado nga rider sa usa ka ride hailing company.
Matod ni Valleser nga ang biktima may gikatransakyon sa dapit diin siya gipusil patay kay layo kini gikan sa ilaha sa Badyang, Toong.
Si Valleser niingon nga ang kapuyo sa biktima nisulti nga si Gañolon may cell phone apan wa na sa iyang posisyon.
Gituhoan nga gikuha sa killer ang cell phone sa biktima aron di mahibaw-an ang ilang mga transaction.
Apan matod ni Valleser nga sa ilang pagpalawom sa imbestigasyon, ilang nailhan ang killer nga usa ka drug personality.
Iyang gitan-aw ang anggulo sa ginadiling drugas isip motibo.