Bag-ong natawo nga bata’ng babaye nga gituohang gilabay sa iyang inahan ang napalgan nga naglutaw sa sapa nga wa nay kinabuhi alas 7:30 sa buntag sa Sabado, Abril 12, 2025, sa Sitio Himumbongan, Barangay Cantuod, Lungsod sa Balamban.
Si Police Lt. Col. Pedy Noval, hepe sa Balamban Police Station, mibutyag sa Superbalita Cebu nga nakadawat silag impormasyon kabahin sa puya nga naglutaw sa sapa.
Sa pag-abot sa iyang mga imbestigador, gisugat sila sa usa ka Melvin Napoles Delfin, 50, minyo nga taga sa Sitio Kalubihan sa maong barangay nga maoy nakakita sa puya.
Sumala pa ni Delfin nga niagi siya sa dapit dihang nakit-an niya ang bata nga naglutaw.
Dali kini niyang gi-report sa barangay nga maoy nipahibalo sa kapulisan.
Matod ni Noval, sa pagka-karon, nagpadayon pa ang ilang imbestigasyon aron mailhan ang inahan. / GPL