Nagsugod ang bag-ong hugna alang sa komunidad sa Persons with Disability (PWD) sa Barangay Umapad dihang gipahigayon sa mga miyembro ang ilang unang opisyal nga miting karong buwana niadtong Domingo, Hunyo 22, 2025, sa Barangay Gymnasium sa Umapad, Dakbayan sa Mandaue.
Ang maong assembly gipangulohan ni kanhing barangay konsehal Greg Allan O. Pialago kinsa karon nagsilbi nga presidente sa PWD Chapter sa Umapad.
Nitambong sa tigom ang pipila ka mga sakop sa PWD community nga giubanan sa pipila sa ilang mga sakop sa pamilya nga nisuporta. Ang panagtapok nagsilbi nga lugar alang sa bukas nga dayalogo ug diskusyon sa mga importanteng butang kalabot sa kaayuhan ug kalambuan sa organisasyon ug sa mga konstituwente niini.
Usa sa mga mahinungdanong gihisgutan sa agenda mao ang pagplano ug pagporma sa mga polisiya ug mga programa nga gitumong sa pagpalig-on sa misyon sa organisasyon sa pagpasiugda sa inclusivity ug paghatag og suporta sa mga miyembro niini. Naglakip kini sa mga inisyatibo alang sa pagpauswag sa kapasidad, paghiusa sa komunidad, ug social assistance.
Tukma sa panahon ang maong miting tungod kay kasamtangang nag-ilis og liderato ang lokal nga kagamhanan human sa eleksiyon sa Mayo 2025, diin nidaog ang kanhi board member nga si Jonkie Ouano isip bag-ong mayor sa Dakbayan sa Mandaue.
Uban sa bag-ong administrasyon, nanghinaot ang mga miyembro sa PWD community nga ilang mga kabalaka ug panginahanglan hatagan unta og mas dakong prayoridad, ilabina sa aspeto sa pinansyal nga tabang.
Daghang miyembro ang nipadayag sa ilang tinguha nga usbawan ang kantidad sa financial assistance nga gihatag sa mga rehistradong PWDs.
Sa pagkakaron, ang mga kwalipikadong miyembro makadawat ug pinansyal nga tabang nga nagkantidad og P3,000. Apan, nabutyag atol sa tigom nga pipila ka mga miyembro, partikular sa Siyudad sa Sugbo ang wala maka-claim sa ilang gikatakdang financial assistance atol sa payout period niadtong Hunyo 14 ngadto sa 19, 2025.
Sa talaan sa Cebu City Treasurer’s Office (CTO), mokabat og 338 ka PWDs ang wala makadawat sa ilang financial aid atol sa payout period.
Naghatag kini og mga kabalaka sa grupo, labi na tungod kay ang pinansyal nga tabang usa sa tinubdan sa suporta alang kanila.
Giawhag ni Presidente Pialago ang tanang miyembro, ilabina kadtong bedridden na o dili makaproseso sa mga kinahanglanon sa ilang kaugalingon nga makig-alayon sa ilang mga sakop sa pamilya o mga tig-atiman aron masiguro ang tukma sa panahon nga pag-renew sa ilang mga identification card.
Kini nga mga ID mahinungdanon alang sa pagkuha sa mga benepisyo ug kinahanglan nga ma-update alang sa umaabot nga pagpanghatagay.
Dugang pa, gihisgutan sab sa miting ang kamahinungdanon sa husto nga pagparehistro ug aktibo nga miyembro sa organisasyon.
Sa mga dili pa rehistrado o interesado nga mahimong miyembro, giawhag sila sa mga opisyal sa PWD nga mobisita sa buhatan sa PWD nga nahimutang sulod sa barangay hall.
Andam ang mga opisyal ug volunteers sa pagtabang sa proseso sa pag-apply ug paggiya sa mga interesadong indibiduwal pinaagi sa gikinahanglang mga lakang aron makapahimulos sa umaabot nga mga benepisyo ug mga programa.
Nagtapos ang panagtigom nga puno sa paglaom diin ang mga miyembro nagpaabot og mas inklusibo ug matinud-anong pagdumala ilawom sa bag-ong administrasyon.
Nagplano sab ang mga opisyales sa pagdumala og regular nga mga miting aron mapadayon ang pagpasabot ug pag-apil sa komunidad.
Samtang nagapadayon pag-uswag ang komunidad sa PWD sa Barangay Umapad, ang ilang panaghiusa nga tingog nagapadayon sa pagpasiugda sa pagpanalipod sa ilang katungod, aksesibilidad, ug dignidad nga mga bililhon nga gikinahanglan aron matukod ang usa ka tinuod nga inklusibong katilingban. / Sinuwat ni Jessa Bacus, UV-Communication Student