Nabuslot ang buko-buko sa usa ka dalaga nga adunay kapansanan kon PWD human gidunggab sa hubog alas 6:20 sa buntag, Sabado, Hulyo 26, 2025 sa Sitio Buli, Barangay Duljo Fatima, dakbayan sa Sugbo.
Ang biktima si Abegail Pagusara Gilig, 29, taga Spolarium Street, Barangay Duljo Fatima, dakbayan sa Sugbo, daling gitabang sa mga silingan og gidala sa Cebu City Medical Center (CCMC).
Hinuon, nadakpan ra sa mirespondeng kapulisan ang suspek nga si Mark Dave Jamin Gonisto, 30, ex-convict, nagpuyo sa nahisgutang lugar.
Sa imbestigasyon sa Mambaling Police Station, niagi ang biktima tungod sa panimalay sa suspek.
Tungod kay matud pa hubog og sabog sa ginadiling drugas ang suspek, nag-tripping kini sa mga mangagi.
Akto nga niagi ang biktima, gisundan kini sa suspek og giduslak ang buko-buko.
Hinuon, naa na sa luwas nga kahimtang ang biktima.
Gikataho nga mag-tripping ang suspek kun mahubog o magtama. Nasayran usab nga daghan na og nadawat nga reklamo ang barangay batok sa maong suspek. / GPL