Person with disability (PWD) gipusasan base sa warrant of arrest sa Martes, Pebrero 27 gumikan sa iyang giatubang nga duha ka mga kaso’ng estafa sa Barangay Poblacion 3, Carcar City.
Si Merlina ‘Merli’ Moreno Limbaga, 51, dalaga, taga Sitio Anunang, Brgy. Liburon, Carcar City gisikop sa mga sakop sa tracker team sa Carcar Police Station.
Si Judge Jedyn Venita Ordonez Tejada, Presiding Judge sa Municipal Trial Court (MTC) Branch 76, Marikina City maoy niisyu sa warrant of arrest pinitsahan og Pebrero 22, 2024.
Una nang nakadawat og subpoena si Limbaga niadtong Enero 2024 apan giingong wa kini niya panumbalinga.
Ang kaso ni Limbaga may labot sa investment sa dihang didto pa siya sa Manila, giingong duha ka mga tawo ang ning-invest og tag-P50,000.
Giingong wa siya nakatuman sa gisaad sa dihang naalkansi ang maong investment, ilabi na nga nasakit siya og diabetes.
Gani, naputlan sa tiil ug gikataho’ng iyang nagamit ang kuwarta. Hinuon ang huwes mitugot sa akusadon nga makapiyansya og P6,000 matag usa sa kaso. / GPL