NASUTA nga usa diay ka Person with Disability (PWD) kadtong nag-viral nga gitabangan og kulata sa mga sakop sa gang sa A. Lopez St., Barangay Calamba, Siyudad sa Sugbo niadtong Sabado, Agusto 9, 2025.
Ang biktima naila sa alyas nga Dandan, giingong namadlong sa gubot tali sa duha ka mga gang.
Apan imbes mohunong ang gubot, siya na hinuon ang gihimong sentro sa kasuko ug gitabangan og kulata.
Sumala ni Ana Liza Ewayan, Gender and Development (GAD) Focal sa Barangay Calamba, nagsugod ang insidente dihang niadto ang unom ka menor de edad sa lugar aron mopalit og fried rice. Pagkakita ni Dandan kanila, iya silang gipasidan-an nga dili manghilabot aron dili magkagubot.
Samtang sila nag-estoryahanay, dunay laing grupo nga nanglabay og botelya.
Nagtuo si Dandan nga kauban sa unang grupo ang nagbato busa iya silang gigukod.
Sumala sa report, dunay dala nga kutsilyo ang biktima niadtong higayona.
Namalik ang mga mas magulang nga kauban sa mga menor de edad ug giataki si Dandan, gikulata, ug gipatid-patiran hangtod natumba samtang gikuhaan og video.
Human nag-viral ang video sa pangulata, daling niaksiyon ang Sawang Calero Police Station 6 kauban ang Department of Social Welfare and Services (DSWS) ug mga opisyal sa Barangay Calamba.
Nagpahigayon og dayalogo ug nitambong ang biktima ug ang 12 ka mga batan-on nga nalambigit, uban ang ilang mga ginikanan.
Matod ni Aldrin Zamora sa DSWS, gihisgutan sa dayalogo ang mga programa nga mahimong ipatuman alang sa mga batan-on, ingon man ang posibleng pagpasaka og kaso kon gikinahanglan.
Gipahimangnuan sab ang mga ginikanan sa ilang responsibilidad sa paggiya sa ilang mga anak aron malikayan ang ingon niini nga insidente. / JDG / AYB