GIDUSO sa konseho ang paghatag og libre nga parking sa unang tulo ka oras ngadto sa mga person with disability (PWDs) sa tanang pampubliko ug pribado nga establisemento nga naningil og parking fee sa Dakbayan sa Mandaue.
Nadawat sa konseho ang draft niadtong Hulyo 17, 2025, ug gipasa kini sa unang pagbasa.
Si Konsehal Jimmy C. Lumapas ang nangamahan sa ordinansa, samtang si Konsehal Carlo Pontico Fortuna ang co-author.
Ang Persons with Disability Affairs Office (PDAO) sa Mandaue City maoy mobarog sa pagpatuman sa maong lakang sa higayon nga maaprubahan sa third reading.
Ang gisugyot nga polisiya naglangkob sa nagkalainlaing pasilidad apil na ang malls, eskwelahan, ospital, commercial nga negosyo, ug uban pang establisemento nga naningil og parking sa sulod sa Mandaue City.
Ang ordinansa nagtinguha sa pagpalambo sa mobility, social justice ug patas nga oportunidad alang sa mga PWD.
Naghatag kini og mga benepisyo subay sa nasudnong balaod sama sa 1987 Konstitusyon, Batas Pambansa Blg. 344, ug Republic Act No. 10070, nga nagmando sa accessibility ug proteksyon sa mga katungod sa PWD.
Aron makapahimulos sa libreng parking, kinahanglan nga mopakita ang mga PWD og balido nga PWD identification card.
Ang mga indibiduwal, korporasyon, o ahensiya nga mapakyas sa pagsunod sa ordinansa mahimong mag-atubang og multa nga moabot ngadto sa P5,000.
Ang mga balik-balik nga kalapasan mameligro nga bawian sa ilang mga permit ug lisensya. / CAV