Kapin sa 290 ka mga empleyado sa QBE Philippines ang nisalmot sa Brigada Eskwela 2025 aron motabang sa pagpangandam sa Bagong Lipunan Elementary School ug Zapatera Elementary School sa Dakbayan sa Sugbo.
Ang ilang paningkamot usa ka paagi sa pagtabang sa mga magtutungha ug magtutudlo nga makaandam sa mas limpyo ug kombinyenteng palibot sa eskwelahan para sa umaabot nga school year.
Ang kalihukan gipasiugdahan sa Team Verde, ang sustainability network sa mga empleyado sa QBE, ug giubanan sa QBE Foundation sa Pilipinas.
Lakip sa ilang gibuhat mao ang paglimpyo sa mga classroom, pagpintal sa mga bungbong ug lingkuranan, pagputos sa mga libro, ug uban pang mga buluhaton nga kasagarang gihimo sa Brigada Eskwela aron matabangan ang mga eskwelahan nga adunay limitadong pundo.
Ang Brigada Eskwela usa ka tinuig nga programa sa Department of Education (DepEd) nga nagtigom sa suporta sa mga ginikanan, alumni, lokal nga komunidad, ug pribadong sektor aron manalipod ug motabang sa pampublikong mga tunghaan.
Ang partisipasyon sa QBE sa maong kalihukan usa ka paagi sa ilang padayong pakig-uban sa komunidad diin sila aktibong nag-operate.
Dili lang mga regular nga empleyado ang nanambong, kon dili lakip sab ang senior leaders sa kompanya nga personal nga niuban sa mga boluntaryo sa pagpintal ug paglimpyo.
Kini nagpakita sa ilang tinuod nga interes nga maapil sa mga lihok nga makatabang sa katilingban.
Matod sa QBE Foundation, dugay na silang aktibo sa pagtabang sa mga tunghaan sa Sugbo dili lang sa Brigada Eskwela apan lakip sab ang mga programa sama sa paghatag og learning materials, pagpaayo sa school facilities, ug pagpatuman sa school-based feeding program aron masuportahan ang nutrisyon sa mga estudyante.
Gihimo ang kalihukan uban sa pakigtambayayong sa Philippine Business for Social Progress (PBSP), usa sa mga kauban sa QBE sa ilang mga community engagement programs.
Ang QBE usa ka internasyonal nga insurance company nga may shared services center sa Cebu ug Manila diin daghang mga Filipino ang nagtrabaho sa pagserbisyo sa global nga operasyon sa kompanya.
Pinaagi sa mga aktibidad sama sa Brigada Eskwela, nagpabilin ang ilang paningkamot sa pagpakita og malasakit ug pakig-alayon sa lokal nga komunidad. / PR