Human sa dili maayong kampanya sa Gilas Pilipinas sa kasamtangang nagpadayon nga 2025 FIBA Asia Cup, adunay nitumaw nga maayong balita alang sa national team.
Kini human nipagawas ang FIBA og pinal nga desisyon kabahin sa kaso ni Fil-Am Quentin Millora-Brown, kinsa gitugtan na sa world basketball governing body nga makaduwa sa Gilas isip usa ka local player.
Ang 6’10” nga si Millora-Brown gikonsiderar gyud unta sa Gilas nga kuhaon alang sa kampanya niini sa FIBA Asia Cup apan ang problema, wala pa kini nakakuha og pagtugot gikan sa FIBA nga makaduwa isip local player.
Niadtong higayuna, puwede ra unta makaduwa si Millora-Brown sa Gilas apan isip naturalized player, posisyon nga gipanag-iya na ni Justin Brownlee.
“He’s awesome. I’d love to have him. He is physical. He gets to the offensive boards real well. Great size,” matod ni Gilas coach Tim Cone.
Ang legal team ni Millora-Brown taudtaod na sab naglihok aron matugotan kini sa FIBA nga makaduwa sa Gilas isip local player ug nagbunga og maayo ang tanan.
Si Millora-Brown, 25, maoy nangulo sa University of the Philippines (UP) Maroons aron maangkon ang kampyunato sa niaging season sa UAAP. / ESL