Gimando ni Cebu Governor Pamela Baricuatro ang pagpahunong sa tanang quarry activities ug pag-release sa permits sama sa sand and gravel ug special disposal permits tibuok Probinsiya sa Sugbo sulod sa 30 ka adlaw.
Kini maoy gimando ni Baricuatro sa Martes, Hulyo 29, 2025.
“We need to review and naa man guy mga complaints regarding sa mga quarry operations and permits nga we need to review and evaluate kon kinsa gyud ni ang mga operator and if they are compliant,” matod ni Baricuatro sa Hulyo 29, 2025.
Hinuon kompyansa ang gobernador nga dili maapektahan ang mga proyekto sa mga operator sulod sa maong mga adlaw.
Gumikan kay duna pa’y mga stockpile sa mga hardwares nga mahimong kuhaan og suplay sa mga kontraktor.
Ang gobernador nimando sab sa pag-umol sa special review committee nga mohimo og pagsusi ug pagtuki sa tanan nga permits.
Nalakip sa nahisakop sa maong komitiba mao sila si Aldwin Empaces isip Assistant Provincial Administrator, Atty. Guiller Ceniza nga pangulo sa Provincial Legal Office, Atty. Roy Salubre, pangulo sa Treasurer’s Office, Atty. Kevin Dinsay, Executive
Assistant sa goberndor ug Robel Bontuyan isip pangulo sa Provincial Environment and Natural Resources Office (Penro).
Subay sa nasayran, adunay 10 ka active quarry permits samtang siyam ang special disposal permits nga gi-release sa kagamhanan sa Lalawigan sa Sugbo.
Gimanduan sab ang komitiba sa pagdeterminar sa volume of extraction o disposal nga nahilakip sa maong mga permit.
Matod ni Bontuyan nga ang matag permit gitugotan nga maka-extract og moabot 10,000 cubic meters nga quarry resources.
Ipahigayon sab ang actual inspection ug ang pagsusi kon nahisubay ba sa provision sa Revenue Code sa Lalawigan sa Sugbo ug kon nituman ba kini sa tanang environmental laws ug regulations.
Kini himuon sulod sa usa ka buwan, apan kon nahuman na pagsusi ang usa ka quarry company ug walay nakitang kakulian, mahimo nang ilibkas ang suspension.
Samtang ang mga makalapas, mag-atubang og tukmang kaso ug penalties subay sa balaod. /