Niapil na sa praktis sa Gilas Pilipinas niadtong Lunes, Hulyo 21, 2025, si Kevin Quiambao human sa iyang training sa Amerika kabahin sa iyang tinguha nga makakuha’g luna sa National Basketball Association (NBA) Summer League.
Ang Gilas sulod na sab sa pipila ka mga semana nagsugod sa pag-traning alang sa ilang kampanya sa Fiba Asia Cup, nga ipahigayon karong Agusto 5-17, 2025, sa Jeddah, Saudi Arabia. Hinuon, dili pa kompleto ang ilang puwersa.
Nakaapil na sa training sa Gilas sila si Justin Brownlee, Dwight Ramos, Carl Tamayo, AJ Edu, Scottie Thompson, Japeth Aguilar, Troy Rosario, RJ Abarrientos, Chris Newsome, ug Jamie Malonzo.
Wala pa nakaapil sila si June Mar Fajardo ug CJ Perez sa San Miguel Beemen, ug Calvin Oftana sa TNT Tropang 5G tungod sa kasamtangang nagpadayon nga finals series sa Philippine Basketball Association (PBA) Season 49 Philippine Cup. / ESL