GISUBAY na og sugod ni Filipino basketball star Kevin Quiambao ang direksyon nga posibleng maghatod kaniya sa katumanan sa iyang damgo nga mahimong labing unang lumad nga Pinoy nga makaduwa sa National Basketball Association (NBA).
Niadtong Huwebes, Hulyo 3, 2025 (PH time), ang produkto sa De La Salles University (DLSU) Green Archers niabot na sa Sacramento, USA aron sugdan ang seryusong paggukod sa iyang pangandoy.
Si Quiambao, 24, kinsa two-time UAAP MVP, moapil sa training camp sa Sacramento Kings karong Hulyo 10-20 alang sa kampanya niini sa NBA Summer League.
“Sactown babyyyy,” caption sa hulagway nga gi-post ni Quiambao sa iyang Instagram account kabahin sa iyang paghiabot sa Sacramento.
Kining maong post nakadugkat dayon og kadasig sa Filipino basketball fans nga nagsubay sa karera ni Quiambao gikan pa sa iyang pagduwa sa college basketball.
Ang pagduwa sa NBA Summer League usa ka mahinungdanong lakang alang sa sama ni Quiambao nga nangambisyon nga makaduwa sa NBA.
Sa kampo sa Sacramento, ikahimamat og balik ni Quiambao ang kanhi MVP sa Philippine Basketball Association (PBA) nga si Fil-Am Jimmy Alapag kinsa kasamtangang assistant coach sa Kings.
Gilaumang buhaton ni Alapag ang tanan aron matabangan si Quiambao nga matuman ang dakong pangandoy niini.
Sa sayo pa, gipadayag ni Quiambao ang iyang dakong pagsalig nga matuman ang iyang pangandoy.
Apan kon motiglom ang pangandoy ni Quiambao, gituohang mobalik siya sa iyang team sa Korean Basketball League (KBL) nga mao ang Goyang Sono Skygunners.
Sa iyang pagduwa sa KBL, si Quiambao nag-average og 16.9 puntos, 6.3 rebounds, 3.9 assists, ug 1.3 steals sa 2024-25 season. / ESL